,,Úr einu í annað" er eitt af mörgum verkefnum sem kennd voru á námskeiðinu ,,Framtíðin í höfn?" Verkefnin mynda saman eina heild / einn heim, en geta einnig staðið sem sjálfstæð verkefni. Á vefnum, undir ,,Framtíðin í höfn?" er hægt að sjá heiti annarra verkefna námskeiðsins.

I. Grunnmynd
Nemendur eru beðnir um að safna 6 litlum hlutum sem fönguðu athygli þeirra í lítinn poka. Fyrirmælin eru að beita innsæi og frumkvæði við söfnunina og vera óhrædd við að skipta út hlutum eftir því sem safnið tekur á sig mynd.
Hlutunum er raðað á blað. Útlínur þeirra eru dregnar upp með blýanti. Sjálfsagt er að endurtaka formin á blaðinu. Horft er á rýmin á milli hlutanna og formin sem mismunandi útlínur mynda saman. Sum formin eru þakin lit og mynda flöt, önnur form standa sem línur. Fundnu hlutunum er raðað á myndflötinn. Nemendur velta fyrir sér samspili tvívíddar og þrívíddar og hvernig hægt er að skapa frásögn / heim með uppröðun. Er hluturinn nálægt útlínum, til hliðar við skuggamyndina, eða á allt öðrum stað á myndfletinum?

II. Líkanagerð                                                                                                                                                                  Ný efni eru kynnt til sögunnar og rætt um þau (t.d. bönd, svampar og plasthimnur). Nýi efniviðurinn er byggingarefnið sem lyftir upp tvívíðum fleti grunnmyndarinnar og býr til þrívíðan heim. Unnið er áfram með grunnmyndina og nýja efninu er raðað ofan á hana. Brýnt er að nemendur velti fyrir sér efnisvali, samskeytingu efna og staðsetningu þeirra á blaðinu. Horft er á samtal hlutanna. Hvernig eru tengsl hlutanna / efnanna? Tengjast þeir allir eða bara sumir? Smátt og smátt myndast nýr heimur með eigin tilgang og frásögn. Vangaveltur og tilraunir eru mikilvægir þættir vinnunnar. Til að verkið leiði mann áfram á óvæntar slóðir er gott að handfjatla efnið og prófa mismunandi útfærslur áður en efnin eru límd föst á myndflötinn. Hópnum er skipt í minni hópa ( 4- 5 manns) þar sem líkönin eru kynnt og rætt um þau. Er hægt að horfa á myndflötinn sem líkan af heimi / borg? Ef svo er, hvernig heimur er þetta?